“PAŞA Bank” səhmləri bank tərəfindən buraxılan adi səhmlərdir.
Bu səhmləri alan investor bankın səhmdarına çevrilir və aşağıdakı hüquqlara malik olur:

• Bankın mənfəətindən dividend almaq
• Səhmdarların ümumi yığıncağında iştirak etmək və səs vermək

IPO çərçivəsində “PAŞA Bank” səhmlərinin 5%-ni bazara təqdim edir.

Dividend – şirkətin mənfəətinin səhmdarlar arasında bölüşdürülən hissəsidir.
İnvestorlar dividendləri sahib olduqları səhmlərin sayına uyğun alırlar.

Dividend gəlirliliyi investorların səhmlərdən əldə etdiyi gəlirin səhmlərin qiymətinə nisbətidir.

Hesablanması: illik dividend /səhmin qiyməti

Nümunə:
Əgər bir şirkət son 12 ay ərzində hər bir səhm üçün 10 AZN dividend ödəyibsə və səhmin qiyməti 100 AZN təşkil edirsə, dividend gəlirliliyi 10% olacaq.

• Dividend məbləği – səhmdarın aldığı real puldur
• Dividend gəlirliliyi – bu məbləğin səhmin qiymətinə nisbətidir

Eyni dividend fərqli qiymətlərdə fərqli gəlirlilik yarada bilər.

Dividendlər bir neçə amildən asılıdır:

• Bankın xalis mənfəəti
• Tənzimləyici kapital tələbləri
• Səhmdarların təsdiqi
• Bankın gələcək inkişaf və investisiya planları

İlk dividend ödənişi 2026-cı ilin iyun ayında gözlənilir (təsdiqdən asılıdır)
İl ərzində əlavə dividend ödənişləri də nəzərdən keçirilə bilər

Bank xalis mənfəətin minimum 30–40%-ni dividend kimi bölüşdürməyi planlaşdırır.
Bu göstərici aşağıdakılardan asılıdır:

• Maliyyə nəticələri
• Tənzimləyici tələblər
• Səhmdarların qərarı

Nümunə:
Əgər bankın xalis mənfəəti 100 milyon AZN təşkil edirsə və ödəniş nisbəti 40%-dirsə, 40 milyon AZN səhmdarlara dividend kimi paylanacaq.

Adətən dividendlər ildə 1 və ya 2 dəfə ödənilir.
Bu, bankın maliyyə nəticələri və səhmdarların təsdiqi ilə müəyyən olunur.

Xeyr. Dividend və onun məbləği zəmanət verilə bilməz, çünki bu, bankın mənfəətinə bağlıdır.
Dividend gəlirliliyi həm dividend məbləğindən, həm də səhmlərin bazar qiymətindən asılıdır.

Dividendlər 5% mənfəətdən tutulan vergi ilə vergiyə cəlb olunur, lakin hazırkı qanunvericiliyə əsasən 1 fevral 2028-ci il tarixinədək vergidən azaddır (Vergi Məcəlləsi, 102.1.22-2-ci maddə).

Qeyd: Vergi tətbiq olunduğu halda, məbləğ dividend ödənilməzdən əvvəl avtomatik tutulur.

Dividend qeydiyyat tarixi – dividend almaq hüququ olan səhmdarların müəyyən edildiyi tarixdir.
Dividend əldə etmək üçün investor səhmlərə bu tarixdə və ya ondan əvvəl sahib olmalıdır.
Bu tarixdən sonra səhmləri alan investorlar həmin dividenddən yararlana bilməz, lakin gələcək dividendlər üçün hüquq qazanırlar.

Nümunə: Dividend qeydiyyat tarixi: 10 may
• İnvestor 10 may və ya ondan əvvəl səhmləri alır → dividend alır
• İnvestor 10 maydan sonra səhmləri alır → həmin dividenddən yararlana bilmir

Dividend haqqında məlumatlar (məbləğ və qeydiyyat tarixi daxil olmaqla) səhmdarların ümumi yığıncağında təsdiq olunduqdan sonra ictimaiyyətə açıqlanır.

İnvestorlar bu məlumatları aşağıdakı kanallar vasitəsilə əldə edə bilərlər:

• “PAŞA Bank”ın rəsmi veb-saytı
• Bakı Fond Birjası-nın açıqlama sistemi
• Broker şirkətlərin platformaları və məlumat kanalları

Bu yanaşma investorlar üçün həm davamlı dividend gəliri, həm də bankın uzunmüddətli inkişafı arasında balans yaradır.

“PAŞA Bank” olaraq məqsədimiz səhmdarlara sabit dividend təqdim etməklə yanaşı, bankın davamlı böyüməsini təmin etməkdir. Bu səbəbdən mənfəətin bir hissəsi dividend kimi bölüşdürülür, digər hissəsi isə biznesin inkişafına, kapitalın gücləndirilməsinə və gələcək dəyərin artırılmasına yönəldilir.

Abunə yazılışı abunə müddəti ərzində təqdim edilə bilər. Abunə yazılışı 30 gün davam edəcək.

Abunə yazılışında aşağıdakı kanallardan iştirak etmək mümkündür

Rəqəmsal kanallar:

• PAŞA Bank
• PAŞA Kapital
• Birbank Invest
• ABB Invest
• Unicapital
• Leobank
• Yelo Bank

Fiziki kanallar:

• PAŞA Bank filialları (“Port Baku”, “Landmark”, “Bridge Plaza”, "PASHA Private Banking", Gəncə filialı)
• Kapital Bank filialları
• PAŞA Kapital ofisi, Cəfər Cabbarlı küç., 44, Caspian Plaza, 11-ci mərtəbə

İnvestor tərəfindən IPO zamanı sifariş verilərkən ödənilən vəsait sifariş üçün ayrılır.

Əgər bölüşdürmə nəticəsində istifadə olunmayan vəsait qalarsa, bu məbləğ abunə müddəti başa çatdıqdan sonra 7 iş günü ərzində investorun bank hesabına geri köçürüləcək.

Sifariş icra edilmədikdə, sifariş üzrə ödənilmiş məbləğ investorun hesabına geri qaytarılacaqdır.

Abunə yazılışı “PAŞA Bank”ın əlavə buraxdığı səhmləri əldə etmək üçün investorların sifariş təqdim etdiyi prosesidir.

Xeyr. Abunə yazılışı müddəti bitənə qədər verilmiş sifarişlər ləğv edilə bilməz.

Səhmlərin paylanması prosesi abunə müddəti bitdikdən sonra 5 iş günü ərzində başlayır və 7 işgünü ərzində tamamlanır.

Abunə müddəti başa çatdıqdan sonra səhmlərin paylanması prosesi həyata keçirilir. Əgər tələbat təklif olunan səhmlərin sayını üstələyərsə, investor sifariş etdiyi saydan daha az səhm əldə edə bilər.

Əgər səhmlərə olan tələbat təklif olunan həcmdən çox olarsa:

• İnvestor sifariş etdiyi saydan daha az səhm əldə edə bilər
• Səhmlər əvvəlcədən müəyyən edilmiş bölüşdürmə qaydalarına və prioritet prinsiplərinə uyğun şəkildə investorlar arasında paylanır

Bölüşdürmə aşağıdakı ardıcıllıqla aparılır:

1-ci mərhələ
Pərakəndə investorların 20,000 AZN-dək sifarişləri

2-ci mərhələ
Pərakəndə investorların 20,000 AZN-dən yuxarı sifarişləri (əgər əvvəlki mərhələdən sonrasəhmlər qalarsa)

3-cü mərhələ
Hüquqi şəxslər və digər investorların sifarişləri (əgər əvvəlki mərhələlərdən sonra səhmlər qalarsa)

Əgər hər hansı mərhələdə səhmlərə olan ümumi tələb həmin mərhələr üzrə təklif olunan səhmlərin sayından çox olarsa, səhmlər investorlar arasında mütənasib şəkildə bölüşdürülür (allokasiya olunur).

Bölüşdürmə zamanı səhmlər yalnız tam ədəd şəklində təqdim edildiyi üçün hesablamalar nəticəsində yaranan rəqəmlər aşağıya doğru yuvarlaqlaşdırıla bilər. Yuvarlaqlaşdırmadan sonra qalan səhmlər isə sifarişin verilmə tarixi və vaxtına əsasən, ən tez sifariş verən investorlardan başlayaraq paylanır.

Səhmlərin az sayda iri investor arasında cəmlənməsinin qarşısını alır və daha geniş investor kütləsi arasında paylanmanı təmin edir.

Bəli. Ticarət başladıqdan sonra investorlar səhmlərini broker platforması vasitəsilə Bakı Fond Birjasında sata bilərlər. Hazırda bu barədə, potensial “market making” xidmətləri ilə bağlı müzakirələr aparılır.

IPO tamamlandıqdan sonra səhmlər investorun broker hesabına köçürüləcək.
Səhmlərlə birjada ticarətin abunə müddəti başa çatdıqdan təxminən 12 iş günü sonra başlaması gözlənilir.

Səhmlər Bakı Fond Birjasında ticarət olunacaq.

İnvestorlar səhmlərini broker hesabları vasitəsilə izləyə bilərlər.

Ticarət başladıqdan sonra səhmin qiymətini Bakı Fond Birjasında da izləmək mümkün olacaq.

Səhmin daha yüksək və ya aşağı qiymətə malik olması həmin şirkətin digərindən daha dəyərli olması demək deyil.

Səhm qiyməti bir neçə amildən asılı olaraq formalaşır:

• Dövriyyədə olan səhmlərin sayı;
• Şirkətin kapital strukturu;
• Maliyyə göstəriciləri və qiymətləndirmə indikatorları;
• Bazar şərtləri və investor tələbi.

Bu səbəbdən, şirkətləri yalnız bir səhmin qiymətinə əsasən müqayisə etmək düzgün yanaşma hesab olunmur. Daha düzgün müqayisə üçün şirkətin ümumi bazar dəyərinə və maliyyəgöstəricilərinə diqqət yetirilməlidir.

Bu IPO Azərbaycanın kapital bazarının inkişafına töhfə verir:

• Pərakəndə investor iştirakını artırır
• Yerli investor bazasını genişləndirir
• Birjada likvidliyin artmasına dəstək olur

“PAŞA Bank” olaraq bu prosesdə məqsədimiz daha şəffaf və inklüziv investisiya mühitinin formalaşmasına töhfə verməkdir.

Səhm qiyməti “PAŞA Bank”ın ədalətli dəyərinin qiymətləndirilməsi əsasında müəyyən edilmişdir. Bu qiymətləndirmə bankın idarə heyəti, beynəlxalq məsləhətçi və səhm təklifçisi tərəfindən birgə aparılmış geniş təhlilə əsaslanır.

Son qiymət bazar dinamikası tərəfindən müəyyən olunur.

Abunə yazılışının müddəti: 13 aprel – 12 may

"PAŞA Bank" səhmlərinin ilkin yerləşdirmə qiyməti 55 AZN təşkil edir.

IPO (Səhmlərin İlkin Kütləvi Təklifi) abunə yazılışı dövründə potensial investorlar tərəfindən səhm alışı məqsədilə köçürülmüş vəsaitlərə, köçürmə tarixindən etibarən 1 iş günü (T+1) keçdikdən sonra, illik 5% dərəcə ilə (hər gün üçün overnight əsasda) faiz hesablanır. Qeyd olunan faiz dərəcəsi tətbiq oluna bilən vergilər daxil olmaqla göstərilmişdir. Tətbiq olunduqda, müvafiq vergi ödənişləri həyata keçirildikdən sonra faiz məbləği investorların hesablarına köçürülür.